डी. वाय. पाटील कृषी व तंत्र विद्यापीठाचा भारती विद्यापीठाशी सामंजस्य करार

कोल्हापूर:  भारती विद्यापीठाचे डॉ पतंगराव कदम महाविद्यालय आणि डी. वाय. पाटील कृषी व तंत्र विद्यापीठ, तळसंदे यांच्यात नुकताच सामंजस्य करार संपन्न झाला. या करारामुळे दोन्ही संस्थांना विज्ञान व तंत्रज्ञान क्षेत्रात राष्ट्रीय स्तरावर संशोधन करण्यासाठी नवे व्यासपीठ मिळाले आहे. या करारामध्ये विद्यार्थी- प्राध्यापक विनिमय कार्यक्रम,जोड प्रकल्प, प्रगत संशोधन अशा बहूआयामी बाबी राबविण्यात येणार आहेत.

भारती विद्यापीठाचे डॉ पतंगराव कदम महाविद्यालयाच्या वतीने राष्ट्रीय संशोधन परिषदेचे आयोजन करण्यात आले होते. या परिषदेच्या उदघाटन कार्यक्रमात हा सामंजस्य करार संपन्न झाला. यावेळी डी.वाय. पाटील कृषी व तंत्र विद्यापीठाचे कुलगुरू डॉ. के.प्रथापन, डॉ. होमी भाभा विद्यापीठाचे कुलगुरू डॉ आर के कामत, प्राचार्य डॉ.डी.जी.कणसे, उपप्राचार्य डॉ एस एन बोऱ्हाडे, उपप्राचार्य व आयक्यूएसी समन्वयक डॉ.ए.आर.सुपले, अवकाश वैज्ञानिक व परिषदेचे समन्वयक डॉ.दादा नाडे, डॉ. संदीप वाटेगावकर, डॉ राणी पवार, डॉ.के.डी.सोनवणे, प्राचार्य डॉ.एच.एम. कदम डॉ.संभाजी पवार व आदी मान्यवर उपस्थित होते.

विद्यापीठाचे कुलगुरू डॉ. के. प्रथापन म्हणाले " दोन्ही संस्था मिळून भविष्यात संशोधन उपक्रम राबवू व  गरीब, होतकरू विद्यार्थ्याला आंतरराष्ट्रीय स्तरावर संशोधनासाठी संधी उपलब्ध करून देऊ असे बोलून त्यांनी "डी वाय पाटील" ग्रुप बद्दल सविस्तर मार्गदर्शन केले. 

प्राचार्य डॉ. डी.जी.कणसे यांनी कराराद्वारे संयुक्तिरीत्या आंतराष्ट्रीय परिषदा, चर्चासत्र व कार्यशाळा घेऊ व  भविष्यात आंतराष्ट्रीय पातळीवर संशोधन करण्यासाठी दोन्ही संस्था पुढाकार घेतील असे मत व्यक्त केले.

कुलसचिव डॉ.जे.ए.खोत यांनी या कराराबद्दल आनंद व्यक्त करीत विद्यार्थी शिक्षक विनिमय, संशोधन शोधनिबंध, प्रस्ताव, सेमिनार,  कौशल्ययुक्त कोर्सेस संयुक्तरित्या  राबविण्यासाठी कटिबद्ध राहू असे आश्वासन दिले. हा करार करण्यासाठी डॉ.एस एन.बोऱ्हाडे,  डॉ.ए.आर.सुपले, अवकाश वैज्ञानिक  डॉ.दादा नाडे, "डी.वाय पाटील कृषी व तंत्र विद्यापीठाचे असोसिएट डीन डॉ. गुरुनाथ मोटे व डॉ. संदीप वाटेगावकर यांनी अथक परिश्रम घेतले. सूत्रसंचालन प्रा.भारती भावीकट्टी व आभार प्रदर्शन डॉ दादा नाडे यांनी केले.

(Bharati Vidyapeeth's Dr. Patangrao Kadam Mahavidyalaya, Sangli)