डॉ. पतंगराव कदम महाविद्यालयात अण्णा भाऊ साठे जयंती साजरी

 डॉ. पतंगराव कदम महाविद्यालयात अण्णा भाऊ साठे जयंती साजरी 

सांगली: येथील भारती विद्यापीठाच्या डॉ. पतंगराव कदम महाविद्यालयात लोकशाहीर अण्णा भाऊ साठे यांची जयंती साजरी करण्यात आली. यावेळी महाविद्यालयाचे प्र. प्राचार्य डॉ. एस. व्ही. पोरे यांच्या हस्ते अण्णा भाऊ साठे यांच्या प्रतिमेचे पूजन करण्यात आले. या प्रसंगी मनोगत व्यक्त करताना प्र. प्राचार्य डॉ. पोरे म्हणाले की, अण्णा भाऊ साठे यांचे साहित्य संयुक्त महाराष्ट्र चळवळीच्या काळात समाजपरिवर्तनाचे माध्यम ठरले. तसेच त्यांनी साहित्यातून समाजाला क्रांतिकारी विचार दिला. वास्तववादी लेखनीने अण्णा भाऊंनी मराठी वाचकांच्या मनावर आजही अधिराज्य गाजवले आहे. या लोकशाहीराने महाराष्ट्राच्या साहित्य आणि सांस्कृतिक क्षेत्रात आपल्या कार्याचा ठसा उमटविला.अनेक भारतीय भाषांमध्ये तसेच जगभरातील भाषांमध्ये त्यांचे साहित्य भाषांतरित झाले आहे.  या प्रतिभावंत साहित्यिकाने खऱ्याअर्थाने आपल्या साहित्य लेखनातून समाजाला जगण्याची नवी उमेद दिली, क्रांतिकारी विचार दिला म्हणून त्यांना लोकशाहीर या नावाने ओळखले जाते. त्यांनी आपल्या कार्याचा ठसा जनमानसावर उमटविला. त्यांच्या कार्याची प्रेरणा घेऊन त्यांचे स्मरण करणे गरजेचे आहे. 

यावेळी  महाविद्यालयातील उपप्राचार्य डॉ.ए.आर.सुपले, कनिष्ठ विभागप्रमुख प्रा.ए.एल जाधव उपस्थित होते. या  कार्यक्रमाचे नियोजन सांस्कृतिक विभागाच्या वतीने करण्यात आले. या प्रसंगी महाविद्यालयातील सर्व प्राध्यापक, शिक्षकेतर सेवक व विद्यार्थी उपस्थित होते.

(Bharati Vidyapeeth's Dr. Patangrao Kadam Mahavidyalaya, Sangli)